Gereed vir vrystelling op 20 Sep 2004

NB: Alle bydraes tot hierdie bladsy word gesien as in die publieke domein. Dit is nodig sodat nuusdienste hierdie persvrystelling kan kopieer en selfs nuusberigte skep, sonder bekommernis oor die GNU FDL.

Verwyder alles bo die volgende lyn voor verspreiding as 'n persberig.

Wikipedia bereik een miljoen artikels

20 September, 2004:

Die Wikimedia Stigting kondig vandag aan dat die miljoenste artikel geskep is in Wikipedia, sy projek om 'n vry, ope-inhoud, aanlyn ensiklopedie te skep. (Wikipedia.org). Wikipedia, wat in Januarie 2001 begin is, is tans die wêreld se grootste en snelgroeiendste ensiklopedie, met artikels wat aktief bewerk word in meer as 100 tale. Amper 2 500 artikels word elke dag tot Wikipedia bygevoeg, met tien keer soveel opdaterings aan bestaande artikels.

Wikipedia word uitsluitlik deur vrywilligers geskep. Hul bydraes, bywerking en redigering is 'n proses van medewerking. "Die idee om kennis te deel is kragtig", aldus Jimmy Wales, die stigter van Wikipedia.

Wikipedia se werking word beheer deur Wikipedia se amptelike beleid van neutrale oogpunt (Eng: NPOV - Neutral Point of View), wat vereis dat medewerkers persoonlike vooroordeel in artikels vermy. Selfs artikels wat handel oor kontroversiële onderwerpe kan geskep word deur hierdie proses. Medewerkers bou op mekaar se veranderings, en gebrekkige redigering word gou reggestel. "Alles word intyds deur medewerkers nagegaan", sê Wales.

Volgens Alexa.com, beklee Wikipedia nou die posisie van een van die tien populêrste verwysingswerwe op die Internet. Dit word al hoe meer deur studente, joernaliste, en alledaagse navorsers gebruik. Wikipedia is ook al duisende kere aangehaal in 'n verskeidenheid van dokumente en publikasies, insluitend nuusberigte, boeke, akademiese studies, en selfs regsdokumente.

Met sy toegewyde gemeenskap van vrywilligers, het Wikipedia ook erkenning ontvang as 'n webwerf vir gemeenskapinteraksie. Hierdie het gelei daartoe dat Wikipedia twee internasionale pryse gewen het in 2004, die Prix Ars Electronica vir "Digitale Gemeenskappe" en 'n Webby-toekenning vir "Beste Gemeenskap".

Wikipedia loop op 'n wiki-sagtewareplatform genaamd MediaWiki, wat enigeen in staan stel om op enige tyd 'n bladsy te redigeer. Die verandering is dan onmiddellik sigbaar (wiki beteken 'vinnig' in Hawaiïes). Besoekers kan ook ouer weergawes van bladsye besigtig en so sien hoe die artikel ontwikkel het.

Daarbenewens word statiese weergawes van Wikipedia voorberei vir vrystelling op CD of DVD. 'n Duitse weergawe wat versprei word deur Directmedia Publishing sal binnekort beskikbaar wees. Wikipedia werk ook aan 'n tweetalige Frans/Engelse vrystelling van die ensiklopedie op DVD in samewerking met Mandrakesoft, uitgewer van die Mandrakelinux bedryfstelsel, wat ingesluit gaan word in 'n komende verspreiding (Eng: distribution).

Alle Wikipedia-teks word gepubliseer onderhewig aan die voorwaardes van die GNU Free Documentation Licence (GFDL), wat medewerkers mekaar se werk laat verbeter gebaseer op 'n beginsel bekend as "copyleft". Dit beteken die lisensie gee derde partye die reg om Wikipedia-artikels te hergebruik mits hulle hierdie reg ook aan ander oordra. Die MediaWiki-sagteware is beskikbaar onder 'n soortgelyke lisensie wat vir sagteware ontwerp is.

Wikipedia word toenemend veeltalig; in die afgelope jaar is meeste groei ervaar in in die tale buite die Engelse projek. Van die 100 Wikipedia-tale, het 14 tans meer as 10 000 artikels ( Engels: 348 000, Duits: 141 000, Japannees: 72 000, Frans: 52 000, Sweeds: 40 000, Pools: 38 000, Nederlands: 35 000, Spaans: 29 000, Italiaans: 24 000, Deens: 20 000, Portugees: 16 000, Esperanto: 15 000, Sjinees: 13 000, en Hebreeus: 10 000). Die Afrikaanse weergawe groei ook geleidelik, en infrastruktuur vir ander amptelike landstale van Suid-Afrika is ook al geskep.

Die Wikimedia Stigting (wikimediafoundation.org), 'n stigting sonder winsoogmerk, ondersteun afgesien van Wikipedia, ook verskeie veeltalige susterprojekte, insluitend Wiktionary ('n woordeboek en thesaurus by wiktionary.org), Wikiquote ('n samevatting van beroemde aanhalings by wikiquote.org), Wikibooks ('n versameling van handleidings en handboeke by wikibooks.org), en Wikisource ('n bewaarplek vir dokumente in die publieke domein by wikisource.org). Al hierdie projekte word gepubliseer onder die selfde lisensie en loop op MediaWiki-sagteware. Om hierdie projekte te ondersteun het die Stigting meer as VSA$100 000 (R680 000) ingesamel sedert sy ontstaan. Meer inligting is beskikbaar by wikimediafoundation.org/fundraising, waar skenkings ook gemaak kan word.

Aangesien veranderinge elke minuut van elke dag gemaak word, is dit onmoontlik om te voorspel waar Wikipedia en sy susterprojekte gaan wees oor 'n jaar van nou af. Maar Wikipedia se groeitempo het aangehou toeneem in die afgelope maande, en teen die huidige tempo sal Wikipedia in grootte verdubbel oor omtrent ses maande.

Ekstra inligting

Vir vrae en onderhoude, kontak:

{Wikipedia press contact's name}, {Language and/or region} Wikipedia press contact co-ordinator
Phone:
E-mail:

Jimmy Wales, Voorsitter van die raad van trustees van die Wikimedia stigting (slegs Engels)
Telefoon: (+1)-727-644-3565
E-pos: jwales@wikimedia.org

Vir meer agtergrondinligting, sien gerus die volgende (in Engels):