PRISM
 | Nota: El testu siguiente vien d'una entrada del blog de Geoff Brigham, del Conseyu Xeneral de la Fundación Wikimedia. La Fundación Wikimedia ta traduciendo de forma profesional esta entrada al alemán, francés, castellanu y xaponés y espera tenela espublizada pal martes. Con tou el nuesu apreciu esperamos que la comunidá internacional de Wikimedia ayude a traducir esa entrada del blog y esta páxina de comentarios (que son casi lo mesmo) igual que los comentarios que la xente faiga demientres esti periodu de consultes.
Amás, pue haber comentarios na entrada orixinal del blog nel filu wikimedia-l y, seique, n'otres páxines d'alderique. Na midida en qu'estos comentarios puedan tresferise a esta páxina d'alderique, eso fairá más fácil que podamos revisar y comentar les diverses posiciones ya idees. Munches gracies. |
PRISM, espionaxe gubernamental, y Wikimedia: Solicitú de comentarios de la comunidá
La pasada selmana, los medios de comunicación espublizaron información tocante a un programa de vixilancia d'internet del gobiernu de los EE.XX. nomáu PRISM[1] que según l'informe permite que'l gobiernu de los EE.XX. colleche direutamente información personal de los sirvidores de ciertos fornidores de servicios con base nos EE.XX.[2] La mayoría de los fornidores de servicios que supuestamente taben implicaos negaron participar en PRISM,[3] pero'l presidente Obama paez que tien reconocío y defendío la esistencia del programa.
Siguen les dudes y les cuestiones abiertes tocante a la naturaleza y estensión de PRISM. Esos informes públicos, y los conflictos ente ellos, xeneraron preocupación na comunidá de Wikimedia, incluída la Fundacion Wikimedia.
Ónde tamos
La Fundación Wikimedia nun tien recibío solicitúes nin órdenes llegales pa participar en PRISM, pa cumplir cola Foreign Intelligence Surveillance Act (FISA), o pa participar en o facilitar dengún programa secretu de vixilancia d'intelixencia. tampoco tenemos "camudao" los nuesos sistemes pa facer más fácil la vixilancia gubernamental, como afirmó que ye'l casu de dellos fornidores de servicios. [4]
Por qué nos importa
La llibertá d'espresión y l'accesu a la información son valores fundamentales de Wikimedia. La vixilancia pue comprometer estos valores: los editores y los llectores comprensiblemente tienen menos deséu d'escribir y informase cola mesma honradez y llibertá. De mou cenciellu, "el drechu a la intimidá ye necesariu pa la llibertá intelectual."
Amás, mentanto que PRISM ye un programa del gobiernu de los Estaos Xunios, la naturaleza global del tráficu d'internet, ya'l presuntu intercambiu d'información de vixilancia ente gobiernos, significa que los usuarios d'Internet alredor del mundu tan potencialmente afeutaos. Por esto, sentimos la obligación con tola nuesa comunidá global de collaboradores y llectores d'entender más a fondu (y posiblemente responder a) esti problema.
Consulta y aición
Por les munches cuestiones abiertes tocante a PRISM, y la posible importancia d'esti problema pa los nuesos valores fundamentales, creemos que ye apropiao consultar cola comunidá de Wikimedia tocante a los siguientes pasos que podemos dar.[5] Na nuesa opinión, los gobiernos tienen de ser tresparentes col so públicu. Esta tresparencia ye esencial pa la nuesa capacidá (y la d'otres organizaciones de pensamientu asemeyáu) pa determinar si un recursu llegal o constitucional ye apropiáu nun casu como esti.
Mozilla, la Electronic Frontier Foundation, la Free Software Foundation, ya'l Center for Democracy and Technology, ente munchos más, principiaron a trabayar xuntos nesti asuntu. Tienen en preparación una carta abierta al Congresu de los EE.XX., pidiendo tresparencia, investigación, reformes, y responsabilidaes, y piden a los individuos y otres organizaciones interesaes (como la Fundación Wikimedia) xunise a ellos.
Del mou que lo vemos, tenemos un importante papel que xugar p'ayudar a asegurar la proteición de la llibertá d'espresión y l'accesu a la información porque ta rellacionáu cola nuesa misión. D'alcuerdu con esto, creemos que la Fundación Wikimedia tendría de collaborar con eses organizaciones, y posiblemente otres, y xuninos al so esfuerzu pa esixir que'l gobiernu se responsabilice de, y esplique los sos programes de vixilancia d'internet.
Dicho eso, queremos escuchar la so opinión tocante a estes cuestiones enantes de facer cualquier aición. ¿Tenemos que xuninos a les declaraciones y esfuerzos públicos d'eses organizaciones porque tan rellacionaos colos valores y misión de la comunidá de Wikimedia? Por favor dexe les sos opiniones na páxina d'alderique. Consideraremos tolos comentarios; pero, como los fechos tan asocediendo rápidamente, creemos necesario tomar una decisión sobro esto pal 21 de xunu de 2013.[6]
Notes
- ↑ The Washington Post y The Guardian asoleyaron la historia'l 6 de xunu.
- ↑ Un informe anterior calcaba na considerable amplitú de los datos accesibles baxo'l programa. CNET informó más alantre, sicasí, de que'l programa al menos implica dalgún procesu formalizáu y particularizáu.
- ↑ TechCrunch tien espublizao negatives de ocho organizaciones supuestamente implicaes.
- ↑ La vixilancia ye posible ensin la nuesa cooperación. Como resultáu, l'espionaxe del tráficu xeneral d'internet polos gobiernos o por terceros pue afeutar a los nuesos collaboradores y llectores. P'ayudar a torgar esto, los sitios de Wikimedia yá son accesibles baxo HTTPS, ya instalando HTTPS Everywhere fai esto de mou predetermináu. Tamos trabayando col envís de facer HTTPS cada vez más lo predeterminao, lo mesmo pa los llectores que pa los usuarios, ensin la necesidá d'instalar una estensión. Les novedaes espublizaranse nel nuesu blog d'inxeniería.
- ↑ Como yá pues saber, la comunidá de Wikimedia trabayó cola Fundación Wikimedia pa compilar una política tocante a la asociación de la Fundación con determinaos problemes políticos y de polítiques. Aplicase cuando, ente otres coses, la Fundación Wikimedia busca collaborar con otres organizaciones p'actuar sobro una política particular o una cuestión política. Baxo esta política, valorase muncho la consulta a la comunidá.
- ↑ Esta propuesta namái tien l'envís de tratar la participación de la Fundación Wikimedia y nun tien la intención de restrinxir qu'otros Wikimedistes actúen a títulu personal.